BESCHRIBIG OND LAG
Tolmin, d Stadt wo ide ganze Region de Name gäh hed, esch die gröscht Sedlig in Zgornje Posocje (obers Soca-Tal) ond osserdem s wertschaftleche, kulturelle Zentrom ond de Verwaltigssetz vom Tal. D Strosse ond Hüüser send anere sonnige Lag oberhalb vode Möndig vode Flöss Soca ond Tolminka. D Stadt liid genau ide rechtige Entfärnig vode stäile Bärgtäler, so dass ehri Iwohner meldi Wenter chönd gniesse, ond vom Meer ond de Gorica-Äbene, so dass sie schöni Sommer chönd uskoschte. S Gebiet beschtohd us de Täler öber de Tolminka ond de Zadlašcica, ond god öbers Henderland vo Volce ond Ciginj bis zode Landesgränze z Kolovrat.

Tolmin

GSCHECHT
D Region vo Tolmin hed de Ruef, es rebellischs Land z sii. Mettelalterlichi Dokumänt bewiisid e längi Serie vo Ufständ, met em gröschte devo, em Buureufschtand im Johr 1713. Genau die Onrueh hed sech vode Tolminska bis id Goriška-Region, Brda ond witer bis uf Nord-Istria usbreitet. Är esch gnadelos vode Richsarmee nedergschlage worde ond die 11 Afüehrer köpft. Während em 1. Wältchrieg hed Tolmin als Basis dient för de siegriich Dorchbroch dör d Soca-Front. D Gschecht vode Stadt ond ehrere witere Omgäbig esch sehr beldhaft im Tolmin Museum dargschtellt.

KULTURERBE
Die spezielle Eigeschafte vo Tolmin send s Zentrum vode Altstadt, e moderne Sportpark ond tuusig Johr alti Borgruine z Kozlov Rob. Ide ganze Region trefft mer uf verschednigi Öberräschte vom 1. Wältchrieg. S schönschte Monumänt us dere Ziit esch zwifellos d Chele vom Heilige Geischt z Javorca, wo vo österrichisch-ongarische Soldate aneme hervorragende Ort bout worde esch öberem Polog, em Osseposchte vode Herte im Tolminka-Tal, zom ehrne gfallene Kamerade z gedänke. S Museum, d Bibliothek, d Schuele ond die öffentleche Plätz vo Tolmin bietid Platz för verschednigi Aläss, Usstellige ond Präsentatione s ganze Johr öber. Tolmin esch au es beliebts Ziil för slowenischi ond osländischi Könschtler.

NATURERBE
Schlochte ond Bassins: Die berüehmtischte send d Bassins vode Tolminska ond de Zadlašcica am Igang zom Triglav Nationalpark, wo glichzitig au die tüfschte Pönkt send (180 m.ü.M.). Speziell ade Tolminka-Bassins esch en Thermalquelle am Ändi vom Wäg.
Wasserfäll: D Region cha met mehrere Rekordhalter uftrompfe (Brinta-Wasserfall 104 m, Gregoric-Wasserfall 88 m) ond hed au mehreri chlineri, aber ned weniger schöni Juwel z biete, wo ide Schlochte vo Mrzli Potok, Godica, Pšcak ond Sopotnica verschteckt send. Well de Zuegang zode mäischte Wasserfäll zemlech schwerig esch, empfählid mer üch, e Füehrer izschtelle.
Höhle: Obwohl Höhle ned gross för Touriste-Bsüech gäignet send, gets vel, wo emmerno chönd besechtiget wärde onder de Füehrig vo Experte.

    
Tolmin-Schlocht                              Mrzli Potok-Wasserfall

EXKURSIONE OND TOURE
Kozlov Rob: De Ufschteg uf em Waldwäg ade Borgruine verbi bis zom Gepfel vom Högu werd met ere wonderbare Ussecht belohnt.
Confluence: E gmüetleche Spaziergang zode Möndig vode Soca ond de Tolminka cha zoneme Trip flossufwärts de Tolminka entlang ond bis zode Tolminka-Basins erwiteret wärde.
Tolminka-Tal: S Tal cha met em Auto oder z Fuess bis zom Herte Osseposchte vo Polog agluegt wärde, ond vo det chammer z Fuess bis Javorca oder de mystische Tolminka-Quelle witermache. D Bärgdörfli uf de sonnige Terasse onder de Bärgspitze vom Cadrg, Tolminske Ravne, send z Fuess, met em Auto oder met Mountanbikes erräichbar.
Mengore: Det chammer en alti Pilgerchele z oberscht ufem Högu öber Kozaršce bsueche, wo de Heilige Jongfrau Maria gwedmet esch. Sie esch omgäh vo Befestigongsalage usem 1. Wältchrieg.